الخميس 23 أكتوبر 2014 - 7:37 ص
أهم الأخبار:

أحدث أخبار الرياضة

إقرأ أيضا

أصدقاؤك يفضلون:

أرشيف الدستور الأصلي

أحمد عفيفي يكتب : خطيبة السيسي!!
الخميس 17 أكتوبر 2013 - 8:44 م رأي ورؤى

أحمد عفيفي

احلف من دلوقتي وابصم بالعشرة ان لو السيسي رشح نفسه " وحيرشح نفسه ان شاء الله " .. كل ستات مصر حتنتخبه وتديله صوتها وقلبها كمان ، ماعدا طبعا " الولّية " ام ايمن واللي على شاكلتها وشكلها .. وعايز اقولكم من ساعة ما كتبت مقال " ياسيسي بلاش الحنيّة الزايدة دي .. عندنا بنات " .. والستات اللي معايا ع الفيس نازلة فيا شتيمة .. ازاى تقول كده على السيسي .. ده احسن راجل في مصر كلها .. انتوا مستكترين علينا واحد يطبطب على كتفنا وضهرنا بعد الغُلب والقرف اللي شفناه من مبارك ومرسي .. وفين يوجعك يا محترم .. اللي تقوللي انت غيران منه عشان " اقرع " .. واللي تقوللي مكنش ينفع معاك الا مرسي والشاطر .. واللي تقوللي موت بغيظك .. هو السيسي مفيش غيره .. كل ده .. مع اني بحب السيسي وعايزه يبقى رئيس اكتر من كل الحريم دي .. بس عايزه رئيس بجد .. مش معشوق البنات والستات .. مش عايزه براد بت ولا حسين فهمي زمان " بيبص ازاى كده كده اهو .. ويمشي ازاى كده كده اهو .. وحواجبه ازاى كده اهو .. ويقف ويقول انا اهو انا اهو والكون مش أد مقاسي .. ييا ييا ياه ياواد ياتقيل" .. لأ .. كده نبقى احنا بنتمسخر ومش عايز اقول الكلمة التانية .. وكده نبقى بنضر السيسي نفسه ونخلّى الإخوان اللي ميتسموش يتريقوا علينا ويقول عن الراجل كلام مش كويس.

 

اختي مثلا وهى متزوجة ولها احفاد عاتبتني بشدة في التليفون : كله الا السيسي .. اياك تقول عليه تلت التلاتة كام .. وغيرها كتير .. لكن اللي لفت نظري جدا وحفّزني على كتابة المقال ده صديقة على الفيس .. بوستاتها جريئة جدا وفيها خفة دم محصلتش " مش حاقول اسمها " .. ولا اشك لحظة في مصريتها ووطنيتها وحميمية الانتماء للوطن .. لكنها اطلقت على نفسها " خطيبة السيسي " .. ولقيتها مشيّرة مقالي عن " حنيّة السيسي " على الصفحة .. وبتدعوا كل نون النسوة على حد قولها للوقوف أمامي وأمام اى واحد يقول ع السيسي كلمة متعجبش .. وبما انها خطيبته وتعتز بذلك كثيرا .. فإنها تحذر تحذيرا شديد اللهجة .. اللي حيرش السيسي بالميه .. حترش امه واللي خلفوه بالنار .. ده خطيبي يا ناس وحبيبي يا ناس .. محدش يقرب منه.

 

هى بتحبه اكيد ومن حقها تحبه كقائد وطني فذ .. بس بلاش تهريج .. وبلاش ننزل بالرمز الكبير لمجرد فتى احلام والراجل اللي جي على حصان ابيض عشان ياخد ست البنات ويطير بيها على عش الحب .. انا بتكلم جد ومش بهرج .. احنا كده بنضر السيسي اكتر ما بنخدمه .. ولو عايزينه يبقى رئيسنا بجد لازم نرفع من شانه ونُجله ونحترمه بطريقة تانية خالص .. مفيهاش دلع البنات ومياصتها .. وزي ما قلت الكلام ده ينفع مع عمرو دياب .. مع احمد عز الممثل مش التاني .. حبوا فيهم زي ما انتوا عايزين .. ودلعوا في أبوهم زي ما انتوا عايزين .. كل واحد على قده .. مطرب وممثل عادي .. انما قائد في حجم السيسي اللي عايزينه يبقى رئيس جمهورية .. لازم تعبيرنا عن حبه يكون مختلف .. يليق بالراجل واللي عمله عشان مصر وعشان شعبها.

 

مش عايزين واحدة مخبولة تحط صورة السيسي على صدرها .. ترفع صورته اه .. تطالبه يرشح نفسه وتتمسك به .. من حقها .. تشوف " رومانسيته " وهو بيتكلم عن شعبه بطريقة فيها رقي .. مش تتخيل انه بيعاكسها هى ويغمز لها هى .. وبيبعت لها اشارة عشان تقابله بعد الخطاب في حديقة الاورمان بعد ما نضفها من وساخات الإخوان.

 

عشان كده سعدت جدا جدا قبل ما انزل ع الجرنال وانا بتفرج على برنامج صباح اون بضيفة اماني الخياط منال محي الدين عازفة ودارسة موسيقى .. وماشاء الله عليها واعية جدا ودماغها عالية ع الأخر .. وفعلا مش عاجبها الكلام ده خالص ، وهيام البنات بالسيسي والحنيّة اللي نازلة تهر زي الإسهال .. وشايفة زي ما قلت ان الكلام ده مش في صالح السيسي أبدا .. بل سلاح حيستخدم ضده .. وشايفة ان السيسي اكبر بكتير اوي من مجرد ان يكون حلم الستات والبنات .. حتى وان ارتقينا بالمعنى الى سقفه الأعلى .. وكمان مش عاجبها خالص اللي حصل في اوبريت احتفال 6 اكتوبر اللي فات .. مع انها من اشد المطالبين بالسيسي رئيسا .. لكنها ترى ان التطبيل كان زيادة اوي ولا يختلف كثيرا عن اوبريت مبارك اخترناك .. حتى على نفس الوتيرة " هى تتحدث كموسيقية مش بياعة فجل .. يعني فاهمة بتقول ايه " .. وترى ان الاوبريت مش متعوب عليه .. اتعمل على عجل .. حتى اللي كانوا بيغنوا غنوا بطريقة " البلاى بلاك " يعني بيحركوا بقهم والغنوة متسجلة .. " مش عارف انا قلتها صح ولا غلط حكاية البلاى بلاك " .. وشايفة كمان ان كل ده بيخصم من رصيد السيسي مش بيضيف له .. في الوقت اللي بتأكد فيه انها مش شايفة غير السيسي في المرحلة دي تحديدا الأجدر بحكم مصر.

 

كلام واحدة عاقلة وفاهمة .. مش كلام مراهقات وحركات فيسبوك ووردة حمرا وبوسة ع الخد ده والخد ده لايزعل ويغير م الخد ده .. بلاش تهريج يا بنات مصر .. يا أجدع بنات في الدنيا كلها .. احنا عايزين راجل يحكم مصر .. والسيسي راجل وابن راجل .. بس لا هو عمرو دياب ولا هو دي كابريو.. الواد الحليوه بتاع تايتنك!!

تعليقات القراء